الإعلان - Advertising

الإعلان - Advertising

 

الاعلان

على الرغم من إن طريقة الاعلانات  لا تأخد غير جزء من المزيج التسويقى  وعلى الرغم من إن كتير من الشركات  بفهمها القاصر  اختزلت علم التسويق فى مجرد الإعلان فى التلفزيون أو الراديو  يفضل الإعلان هو جزء مهم فى عملية الترويج.

الأنواع الرئيسية فى الاعلان هما الإعلان المرئى مثل الإعلانات فى التلفزيون.

  ايضا يوجد الإعلان المطبوع  مثل الاعلان فى الجرايد والمجلات وفى الإعلان المسموع فى الراديو.

 يوجد الاعلانات فى الخارج  الموجودة على اللافتات فى الطريق  وعلى الكبارى.

 

فى مصطلح مهم جداً فى الإعلان اسمه الرسالة الاعلانية (Advertising Message)  ولازم يبقى متحدد هدفها  واستراتيجيتها  وازاى هتقدر المنظمة توصلها للعميل بالشكل المطلوب.

عند تنفيذ الرسالة الاعلانية بيظهر أفكار كتيرة للتنفيذ  بيعبر عنها شكل الإعلان  ومن ضمن الأشكال والأفكار دى الآتى:-

• عرض جزء من معيشة واحد بيستخدم المنتج أو الخدمة (Slice of Life) فبيظهر شخص فى الاعلان بيستخدم المنتج وكأنه شخص فى بيئة حقيقية  وبيظهر ده دايماً فى منتجات الاكل والشرب.

  مثال : - طفل بيصحى الصبح ياكل أكل معين "المنتج"  (كورن فليكس) مثلاً  قبل مايروح المدرسة  أو واحد بيحلق دقنه بماكينة حلاقة معينة قبل مايروح الشغل  أو شخص جعان دخل مع واحد صاحبه ياكل فى مطعم معين وبكده تبقى دى شكل الرسالة الإعلانية للمطعم.

 

• أسلوب المعيشة أو الحياة (Lifestyle) وده أسلوب بيجذب الناس للمنتج  مش عشان المنتج  بقدر أسلوب الحياة اللى بيخلقه المنتج  وبيتوافق مع أسلوب حياة المستهلكين .

المسيطر على الأسلوب ده الشركات اللى مش بتلاقى فى منتجها حاجة ضخمة تميزه عن المنافسين  وأوضح دليل على كده شركة (بيبسى) واللى بدأت حملتها الإعلانية اللى قايمة على أسلوب الحياة من سنة 1960  لما اتنقلت من التركيز على المنتج ومواصفاته  ومزاياه  لحالة وصف أسلوب معيشة قايم على الشباب والفرح والانطلاق  واللى ببساطة بيظهر أن اللى بيشرب البيبسى هما الشباب وده بيناسب أسلوب حياتهم القايمة على الأصحاب والمرح  وبالتالى اللى استجاب لحملة (بيبسى) هما الشباب من ناحية  ومن ناحية تانية كبار السن اللى شافوا فى المنتج ده شبابهم القديم  ولحد دلوقتى سر نجاح شركة (بيبسى) الإعلانى هو استخدام الشكل ده من الرسائل الإعلانية  بعد ماكانت شركة (كوكا كولا)  المنافس الرئيسى  بيتصف بأنه قائد السوق  وأعلى جودة من أى منافس تانى.

 

• إعلان موسيقى (Musical)  وفكرة الاعلان انها قايمة على موسيقى معينة أو أغنية  وفى مسوقين بيتمادوا فى النوع دى  ويحاولوا يربطوا المنتج بالأغنية دى عشان يفضل الناس يكرروها  ويساعدهم ده فى خلق الانطباع التسويقى (Perception)عند العميل.

   

• الفانتازيا والتخيل (Fantasy) وده شكل رسالة اعلانية بيظهر فيها على سبيل المثال طفل بياكل أكله معينة  المنتج يعنى  فيتحول لراجل كبير قوى.

نفتكر مثال الجبنة المثلثات (ميلكانة) لمّا الولد كان بيبقى فى وسط الماتش  وفريقه مغلوب  فيقوم واكل الجبنة فيتحول بقدرة قادر لبطل ويشوط كورة صاروخية تدخل الجون  وتحقق النصر لفريقه   وطبعاً الأمثلة كتير فى الإعلانات المصرية على النوع ده من الرسائل الاعلانية.

أو إعلانات (أديداس) الشهيرة  واللى بتورينا  إذا ممكن راجل لما يلبس جزمة (أديداس) يتحول لرجل خارق  وممكن يجرى أميال بدون تعب ويشيل فوق كتفه مئات من البشر وطبعاً أهم حاجة شعار الشركة فى نهاية الإعلان "المستحيل لا شئ".

 

• الإعلان المزاجى أو اللى بيخلق صورة وانطباع (Mood and Image) وده أشهر الأنواع فى الرسالة الإعلانية وهو بيخلق حالة مزاجية بيربطها مع استخدام المنتج أو الخدمة.

  مثال : شركة طيران لما تعمل إعلان فتوضحلك  الركاب اللى بيستخدموا الخطوط الجوية للشركة دى  وهما فى غاية الراحة والهدوء.

وزى منتجات الشيوكولاتة  لما توريك الشخص اللى بياكل الشوكولاته وهو فى قمة الاستمتاع والتلذذ.

• خلق رمز أو شخصية (Personality Symbol) ودور المسوق أنه يربط الشخصية بالمنتج  وده بيساعد كتير فى خلق الانطباع التسويقى  وكمان بيساعد فى التسويق بالمديح  وبالذات التسويق بلفت النظر والانتباه (Buzz Marketing) واللى هو جزء من التسويق بالمديح .

الشخصية ممكن تبقى كارتونية أو خيالية زى (فيدو ديدو) بطل (السفن آب).

وممكن يبقى شخصية حقيقية زى أبلة نظيفة لما عرّفتنا أن القطنة متكدبش فى إعلانات (جنرال).

 

• الخبرة الفنية (Technical Expertise) وهى بإظهار ازاى المنتج ده عظيم  واللى قايم على خبراء  صعب تلاقيهم فى منتج تانى.

مثال على كده  منتجات القهوة والشاى  كان الإعلان بيظهر الخبراء وهما نازلين فى أقصى مكان فى افريقيا عشان يجيبوا البن ويختاروا أجود الأنواع.

كمان زى الحملات الاعلانية للسيارات العالمية  وهى بتظهر فى الاعلان الآلات داخل المصنع  والأساليب المتقدمة والحديثة جداً فى تجميع العربية  وازاى العربية فيها مواصفات الأمان والجودة.

 

• الدليل العلمى (Scientific Evidence) وده بإظهار فى الاعلان الدليل العلمى الواضح والصريح اللى يثبت أن المنتج أو الخدمة دى أحسن من المنافسين عن طريق الاستفتاءات وآراء المستخدمين  والتجارب العملية على المنتج.

مثال على كده  منتج معجون الأسنان (كريست) المشهور اللى كان بيجيب أطفال المدارس ويعمل عليهم تجارب ويثبت بيها إنه أفضل وأقوى لأسنان الأطفال.

 

• التظهير (Endorsement)أو التوصية والدليل من مصدر ثقة (Testimonial Evidence) وده يعتبر برضه من أشهر أشكال الرسالة الإعلانية  وبيظهر فى الاعلان شخصيات عادية أو مشهورة بتظهر إعجابها الشديد بالمنتج.

مثال على كده  ممثل أو لاعب كرة مشهور راكب عربية "المنتج" وبيستمتع بإمكانيات العربية الكتيرة  وبيقول للمستمعين والمشاهدين أن لازم يركبوها لأن هيفوت نص عمرهم لو مركبوش العربية الخرافية دى  (واللى طبعاً هما ميملكوش ربع تمنها)

كمان مننساش إعلانات السمنة المصرية المملة  (واللى هى خطر على الأطفال يتفرجوا عليها عشان ميجلهمش شلل و ضغط من صغرهم)  وفيها بيستضيفوا فنانة مشهورة  وتدوق السمنة دى  والسمنات الوحشة التانية بدون ماتعرف أنهى واحدة فيهم بتاعة الشركة  لكنها طبعاً بتختار السمنة بتاعة الشركة لأن طعمها تحفة  وفلاحى ومش مغشوشة  وبريئة من كل العيوب.

 

تبقى ملاحظة أخيرة وهى أن المسوق مش قانون عليه يستخدم شكل معين من الأشكال دى بنفس الطريقة المعروضة  ممكن جداً يخلط نوع أو اتنين  أو حتى كل الأشكال لو حبّ  طالما يقدر يوصل برسالته لأذهان المستهلكين والعملاء.